Comune di Banari

Sos ringratziamentos a sos chi ant cuntribuidu a organizare sas tre dies de poesia a bolu e de istùdiu

Ocannu su 18, su 19 e su 20 de Santugaine sa comuna de Bànari at onoradu a sa mègius manera su poeta chi l'aiat dadu fama e lodes mannas cando fiat in vida: tziu Barore Sassu. Tziu Barore in sos chimbant'annos de carriera poètica in totus sos palcos de Sardigna, est istadu unu de sos chi at amparadu sa limba e sa cultura sarda, cun mìgias e mìgias de garas de poesia cantada a bolu. Su Sìndigu de Bànari e totu s'amministratzione comunale si sunt ammentados de totu custu, paris cun sos sardos chi sunt bènnidos e ant partetzipadu a custas tres dies pro sa poesia improvisada. Sos cumponentes de “su Sòtziu pro sa gara” ant ordingiadu totu su programma cun praghere meda, e ringratziant s'amministratzione de Bànari pro lis àere dadu custa ocasione.
Est istada una cosa bella a bìdere sos pitzinnos de sas iscolas medias de Tiesi iscurtende atentos sos poetas Zosepe Porcu, Dionisi Bitti e Brunu Agus acumpangiados dae “su Cunsonu tiesinu”, e a bìdere poi sos pitzinnos e totu cantende in poesia; sos dischentes de s'Universidade de Tàtari ant poi partetzipadu a su cunvegnu de sàbadu mangianu in Bànari meda atentos e interessados.
Nos paret doverosu ammentare totu sas persones chi ant dimustradu de tènnere a coro custa sienda manna de cultura immateriale chi est sa poesia a bolu: su Sìndigu, sos assessores e sos cussigeris de Bànari; sos voluntàrios chi ant traballadu pro non nos fàghere mancare nudda; Màuru Piredda chi est istadu s'ànima de custu eventu cun su suo impignu continu; sos reladores Bustianu Pilosu, Ignassiu Macchiarella, Paulu Pillonca, sa proff.ssa. Margarida Satta, su dirigente iscolàsticu de Tiesi Maria Cristina Rebeccu, sa mastra Giuanna Chesseddu, s'assessore provintziale Daniele Sanna; sos poetas Brunu Agus, Zosepe Porcu, Dionisi Bitti, Sarvadore Iscanu, Remo Orrù, Efis Caddeo, Zoseppe Caddeo, Paulu Zedda, Antoni Orrù, Robertu Zuncheddu; su Cunsonu tiesinu. Gràtzias puru a Gavinu Sale pro s'acoradu interventu fatu. Non podimus nàrrere gràtzias, imbetzes, a s'assessore regionale a sa cultura, pro non s'èssere mancu presentadu.